Það voru Sóley Björk Gísladóttir og Heiðrún Ásta Torfadótir úr Naustaskóla sem fundu Grenndargralið þetta árið. Þær eru því sigurvegarar í Leitinni að Grenndargralinu árið 2012.
Síðasta þraut birtist á heimasíðunni kl. 18:00 föstudaginn 16. nóvember og þá fór allt af stað. Þátttakendur reyndu að finna rétt svör og gerðu það í kapphlaupi við tímann. Þær Sóley Björk og Heiðrún Ásta voru ekki lengi að leysa lokaverkefnin þrátt fyrir að Heiðrún væri veðurteppt á Egilsstöðum en þær voru í símasambandi allan tímann. Sóley var mætt að heimili Ingunnar Vigdísar Sigmarsdóttur, bókasafnskennara og ljóðskálds, tæpri klukkustund síðar þar sem hún tók við Grenndargralinu.
Sannarlega glæsilegur árangur hjá vinkonunum sem og öllum hinum duglegu krökkunum sem fóru alla leið í þessari löngu og ströngu leit. Í vissum skilningi eru þessir krakkar allir sigurvegarar og eiga heiður skilinn fyrir frábæra frammistöðu. Með dugnaði sínum og áhuga eru þau öðrum mikil fyrirmynd.
Naustaskóli er fjórði skólinn til að vinna Leitina að Grenndargralinu. Áður hafa Giljaskóli, Síðuskóli og Glerárskóli unnið Gralið.
Við óskum Sóleyju Björk og Heiðrúnu Ástu sem og Naustaskóla til hamingju með sigurinn.
Umsjónarmenn Leitarinnar að Grenndargralinu 2012
Það voru þær Sóley og Heiðrún úr Naustaskóla sem fundu gralið fyrr í kvöld. Til hamingju stelpur og til hamingju Naustaskóli! Nánar um fund gralsins síðar.
Löng og ströng leit er að baki og þátttakendur hafa staðið sig með mikilli prýði. Framundan er hörð samkeppni milli liðanna sem eftir standa. Nú gildir að vera sem fljótastur að leysa lokaverkefnin sem vísa á Gralið. Tíunda og síðasta vika í Leitinni að Grenndargralinu 2012 ætti undir öllum eðlilegum kringumstæðum að hefjast föstudaginn 9. nóvember. Vegna þátttöku Grenndargralsins á ráðstefnu í Hafnarfirði helgina 9.-10. nóvember verður birtingu síðustu þrautar frestað um viku. Endaspretturinn fer því fram með eftirfarandi hætti:
Síðasta þrautin birtist á heimasíðu Leitarinnar föstudaginn 16. nóvember kl. 18:00. Þar með hefst kapphlaupið mikla. Ólíkt fyrstu 9 vikunum (þar sem ekki skipti máli hvenær lausnum var skilað) skiptir öllu máli núna að skila lausninni til umsjónarmanns sem fyrst. Þátttakendur geta skilað henni af sér á skólatíma eins og tíðkast hefur fram að þessu. Þar sem tíminn skiptir öllu máli nú má koma lausninni áleiðis með öðrum hætti svo sem með tölvupósti eða símtali. Þátttakendur verða að meta með hvaða hætti auðveldast sé að koma lausninni til umsjónarmanns á sem stystum tíma.
Ef lausnin við þraut nr. 10 er rétt fá þátttakendur síðasta bókstafinn frá umsjónarmanni. Eftir að hafa fundið út lykilorðið og komið því til umsjónarmanns fá þátttakendur lokavísbendingu sem vísar þeim á gralið. Það lið sem finnur gralið sigrar í Leitinni að grenndargralinu 2012. Sigurvegararnir taka gralið með sér ef þeir hafa tök á því en láta aðra keppendur ekki vita af því að það sé fundið.
Aðeins þeir sem hafa skilað inn réttum úrlausnum við öllum þrautunum tíu, fengið bókstafina sem þeim fylgja og fundið lykilorðið fá lokavísbendinguna sem vísar á gralið.
Kæru þátttakendur.
Þið hafið staðið ykkur vel. Frá því í haust, þegar Leitin hófst, hafa nokkur lið hætt þátttöku. Þið eruð komin alla þessa leið vegna áhuga ykkar og þrautseigju. Nú getur allt gerst. Grenndargralið er handan við hornið.
Með dugnaði ykkar og útsjónarsemi hafið þið sýnt að þið getið leyst erfið verkefni á stuttum tíma. Þið megið nú sem fyrr nýta ykkur alla þá aðstoð sem þið getið fengið t.d. frá mömmu, pabba, ömmu og afa. Munið að góðir hlutir gerast hægt!
Gangi ykkur vel.
Umsjónarmenn Leitarinnar að grenndargralinu 2012.
