main image

Hollvinir Kristneshælis bindast samtökum

 

 

 

Stofnfundur Hollvina Hælisins var haldinn að kvöldi fimmtudagsins 21. september sl. í húsnæði Verk-Smiðjunnar að Glerárgötu 34.  Hugmyndin að baki samtökunum er að mynda hóp áhugasamra einstaklinga og fyrirtækja/stofnana sem ætlað er að styðja við uppsetningu og rekstur á setri um sögu berklanna að Kristnesi í Eyjafjarðarsveit, kaffihúsi og mögulega gistiaðstöðu. Kristneshæli var vígt þann 1. nóvember árið 1927 og fagnar því 90 ára afmæli í ár. Hælið varð heimili fjölda einstaklinga á öllum aldri næstu áratugina. María Pálsdóttir leik- og athafnakona hefur unnið ötullega að því um nokkurt skeið að draumurinn um berklasafn á æskuslóðum hennar verði að veruleika. Hún hefur setið að samningaborðinu í því skyni að fá húsnæði á Kristnesi undir fyrirhugað safn. Samhliða þeirri vinnu hefur hún sankað að sér munum og öðrum heimildum sem tengjast sögu berklanna.

Tilgangur nýju samtakanna verður að styðja og styrkja stofnun og starfsemi setursins undir merkjum HÆLISINS  t.a.m. með fjárhagslegum og faglegum stuðningi og myndun tengslanets. Stefnt verður að því að efla tengsl við samfélagið og sérstaklega þá sem tengjast sögu berklanna með einum eða öðrum hætti. Samtökin eru hugsuð sem vettvangur fyrir kynningu á setrinu. Aðild að samtökunum er opin öllum sem vilja vinna að markmiðum þeirra enda greiði þeir árlegt félagsgjald, krónur 2.500 pr. einstakling.

Á fundinum skýrði María frá því hvernig hugmyndin varð til og með hvaða hætti mál hafa þróast síðan. Hún kynnti hugmyndir sínar um framsetningu á setrinu og lagði áherslu á að ekki yrði um „hefðbundið“ safn að ræða með myndum og texta á veggjum og munum á borðum eingöngu. Hún nefndi m.a. leikræna útfærslu þar sem hún og mögulega aðrir starfsmenn setursins klæddust búningum og færu í hlutverk vistmanna og starfsfólks Hælisins.

Á þriðja tug mættu á stofnfundinn. Sköpuðust nokkrar umræður um berklana og Kristneshæli. Regína Torfadóttir sagði frá reynslu sinni af dvöl á Hælinu en hún dvaldist þar um tveggja og hálfs árs skeið sem barn í byrjun sjötta áratugarins. Fleiri tóku til máls og sögðu reynslusögur.

Í lok fundarins var kosin stjórn Hollvina Hælisins. Kosningu hlutu Hildur Hauksdóttir framhaldsskólakennari, Jón Hlöðver Áskelsson tónskáld, Jón Már Héðinsson skólameistari, Kristjana Aðalgeirsdóttir arkitekt og María Björk Ingvadóttir framkvæmdastjóri. Ef allt gengur að óskum standa vonir til þess að setur um sögu berklanna að Kristnesi opni vorið 2018.

Önnur vika Leitarinnar 2017

Hér má nálgast þraut nr. 2.

Leitin að Grenndargralinu 2017 er farin af stað!!!

Fyrsta þraut er komin í loftið. Sjón er sögu ríkari.

 

 

Leitin að Grenndargralinu fer fram í tíunda skipti

Leitin að Grenndargralinu hefst föstudaginn 8. september. Leitin er valgrein fyrir nemendur í 8.-10. bekk í grunnskólum Akureyrar. Full ástæða er til að minna á að Leitin er engu að síður í boði fyrir alla áhugasama, jafnt unga sem aldna. Allir geta tekið þátt. Aðeins þeir sem skráðir eru í valgreinina hafa rétt til að leita að Gralinu í lokin, þ.e. leysa lokavísbendinguna og fara á staðinn þar sem Gralið er falið. Aðrir ljúka keppni þegar þeir hafa ráðið lokavísbendinguna, rétt áður en atlaga er gerð að Gralinu.

Allt sem þarf að gera er að hefja leik þegar fyrsta þraut fer í loftið, fara eftir fyrirmælum, leysa þrautina og skila lausnum til umsjónarmanns með tölvupósti. Fyrir réttar lausnir sendir umsjónarmaður bókstaf til baka sem notaður verður til að mynda lykilorðið. Þetta er endurtekið næstu níu vikurnar eða svo eða þar til kemur að lokavísbendingunni. Þá er Grenndargralið innan seilingar. Einfaldara getur það ekki orðið.

 

Nokkur praktísk atriði vegna Leitarinnar 2017:

  • Leitin að Grenndargralinu er valgrein í grunnskólum Akureyrar (8. – 10. bekkur). Allir mega taka þátt, líka þeir sem ekki völdu Leitina sem valgrein.
  • Ein þraut á viku í 10 vikur. Þrautirnar birtist á föstudögum á www.grenndargral.is undir liðnum Leitin að Grenndargralinu efst á forsíðunni.
  • Lausnum  er skilað til umsjónarmanns með tölvupósti (brynjar@akmennt.is).
  • Þátttakendur  fá bókstaf fyrir hverja rétta lausn. Þeir safna saman bókstöfum. Eftir 10 vikur reyna keppendur að finna hvert lykilorðið er með því að raða þeim saman.
  • Keppendur láta umsjónarmann vita þegar lykilorðið er fundið. Þá hefst baráttan um að finna Gralið. Keppendur fá lokavísbendingu sem vísar á Gralið. Fyrstur kemur, fyrstur fær.
  • Grenndargralið er falið einhvers staðar á Akureyri.
  • Farsælast er að leysa þrautirnar jafnt og þétt. Leyfilegt er þó að skila lausnum inn síðar en að viku liðinni. Þá má einnig skila inn lausnum við fleiri en einni þraut samtímis.
  • Hægt er að hefja leik hvenær sem er eftir að Leit hefst.
  • Þeir sem klára fyrstu 5 þrautirnar og skila inn réttum úrlausnum áður en 6. vika hefst öðlast rétt til að leita að Karamellukrukkunni. Hún er falin innan bæjarmarkanna og þeir sem finna hana eignast hana og innihald hennar.
  • Aðrir en nemendur í 8. -10. bekk mega taka þátt með því að leysa þrautirnar. Þegar kemur að endalokunum eru það eingöngu þeir nemendur á unglingastigi sem skráðir eru í valgreinina sem mega freista þess að finna Gralið.
  • Lokamarkmið: Verða fyrstur til að finna Grenndargralið og fá það til varðveislu í eitt ár.