Grenndargralið

Grenndargralið er fundið! Sunna Katrín Hreinsdóttir í Lundarskóla fann Gralið áður en tvær klukkustundir voru liðnar frá því að lokaþrautin fór í loftið. Aldrei áður hefur sigurvegari verið jafn snöggur að finna Gralið. Hér er jafnframt um fyrsta sigur Lundarskóla að ræða í Leitinni að Grenndargralinu. Gralið var í vörslu Soffíu Vagnsdóttur höfundar sönglagatextans Zikka zakka þar til Sunna birtist og tók við Gralinu úr höndum Soffíu. Lundarskóli mun því hýsa Gralið næsta árið.

Grenndargralið óskar Sunnu Katrínu, sem og Lundarskóla,  til hamingju með sigurinn.

Löng og ströng leit er að baki og þátttakendur hafa staðið sig með mikilli prýði. Framundan er hörð samkeppni milli liðanna sem eftir standa. Nú gildir að vera sem fljótastur að leysa lokaverkefnin sem vísa á Gralið. Endaspretturinn fer fram með eftirfarandi hætti:

Síðasta þrautin birtist á heimasíðu Leitarinnar föstudaginn 11. nóvember kl. 18:00. Þar með hefst kapphlaupið mikla. Ólíkt fyrstu 9 vikunum (þar sem ekki skipti máli hvenær lausnum var skilað) skiptir öllu máli núna að skila lausninni til umsjónarmanns sem fyrst. Þátttakendur verða að meta með hvaða hætti auðveldast sé að koma lausninni til umsjónarmanns á sem stystum tíma.

Ef lausnin við þraut nr. 10 er rétt fá þátttakendur síðasta bókstafinn frá umsjónarmanni. Eftir að hafa fundið út lykilorðið og komið því til umsjónarmanns fá þátttakendur lokavísbendingu sem vísar þeim á Gralið. Það lið sem finnur Gralið sigrar í Leitinni að Grenndargralinu 2016. Sigurvegararnir taka Gralið með sér en láta aðra keppendur ekki vita af því að það sé fundið.

Aðeins þeir sem hafa skilað inn réttum úrlausnum við öllum þrautunum tíu, fengið bókstafina sem þeim fylgja og fundið lykilorðið fá lokavísbendinguna sem vísar á Gralið.

Kæru þátttakendur.

Þið hafið staðið ykkur vel. Frá því í haust, þegar Leitin hófst, hafa nokkur lið hætt þátttöku. Þið eruð komin alla þessa leið vegna áhuga ykkar og þrautseigju. Nú getur allt gerst. Grenndargralið er handan við hornið.
Með dugnaði ykkar og útsjónarsemi hafið þið sýnt að þið getið leyst erfið verkefni á stuttum tíma. Þið megið nú sem fyrr nýta ykkur alla þá aðstoð sem þið getið fengið t.d. frá mömmu, pabba, ömmu og afa.

Gangi ykkur vel.

Brynjar Karl Óttarsson umsjónarmaður Leitarinnar

Skemmtiferðaskipið Victoria Luise var smíðað í Þýskalandi árið 1900 og tók rúmlega 2000 farþega. Upphaflega hét skipið Deutschland en nafninu var breytt í Victoria Luise árið 1910. Skipið var með stærri skipum sem smíðuð höfðu verið á þessum tíma og jafnframt það hraðskreiðasta í heimi frá 1900-1906. Við smíði skipsins var mikið lagt upp úr krafti og hraða á kostnað þæginda fyrir farþega. Hraðinn hafði þær hliðarverkanir að skipið átti það til að hristast fullmikið fyrir smekk sumra farþega. Gekk skipið gjarnan undir nafninu Hanastélshristarinn (The Cocktail Shaker). Árið 1921 var nafni skipsins aftur breytt og nú fékk það nafnið Hansa. Skipið endaði sem brotajárn í Hamborg í Þýskalandi árið 1925.

Níunda og næstsíðasta vika Leitarinnar er farin af stað.