Grenndargralið

Kettir eru eitt af vinsælustu gæludýrum í heimi og þeir verða sífellt vinsælli. Margir á Íslandi eiga ketti, en það er mikil vinna að eiga kött.

Þú þarft að gefa honum reglulega að borða, leika við hann og sýna honum umhyggju og sumir leyfa köttunum sínum að fara út. Ég hef oft lent í því að rekast á lausa ketti hérna í Giljahverfinu og finnst það svolítið ósanngjarnt að kettir mega vera lausir en ekki hundar. Oft er sagt að algengara sé að hundar ráðist á fólk og að hundar séu talsvert hættulegri en kettir, en það þarf ekkert endilega að vera. Ég bendi á að það er verið að selja kattaólar í dýrabúðum þar sem kattaeigendur geta keypt svoleiðis og farið með kettina sína út að labba ef þeir vilja endilega að kettirnir sínir fái að fara út. Svo er líka hægt að kaupa girðingar sem hægt er að setja í garða hjá eigendum en það er bara ef eigendur vilja ekki fara út að labba með kettina sína. Ég er ekki að segja að þetta sé það sem kattaeigendur þurfa að gera ég er bara að benda á auðveldar lausnir. Ástæðurnar fyrir því að kettir ættu ekki að vera einir úti eru t.d. að þeir gætu hlaupið fyrir bíla og bílarnir keyrt á kettina. Ég hef oft heyrt að kattaeigendur hafa misst kettina sína þar sem bílar hafa óvart keyrt á þá og ég hef sjálf verið vitni af því að bíll keyrði yfir kött. Svo eru líka margir sem eru hræddir við ketti og með ofnæmi fyrir þeim. Ég hef líka oft lent í því að ég sé að labba eitthvert og það er köttur sem eltir mig og að það séu kettir sem eru í görðunum hjá fólki. Og svo má ekki gleyma því að kettir skíta oft á gangstéttarnar eða annars staðar í bænum og ég er alveg viss um að lang flestir sem búa hér vilja hafa bæinn sinn snyrtilegan. Og kettir eiga það líka til að fara ofan á barnavagna og leggjast ofan á sofandi börnin og geta þar af leiðandi kæft þau.

Ég vil ekki búa til vesen eða neitt svoleiðis ég er bara að benda á það sem er hægt að laga og vil endilega að það verði gert eitthvað í þessu máli.

Karen Ósk Ingadóttir 8. SKB

Íþróttaaðstaða í Giljahverfi er fín en það væri hægt að hafa aðstöðuna örlítið betri. Í Giljahverfi eru fínir fótboltavellir, körfuboltavellir, einn steyptur völlur og leikvellir. Margir af þessum völlum eru við hliðina á Giljaskóla þótt leikvellirnir séu víða um hverfið.

Við hliðina á skólanum er stórt íþróttahús sem var tekið í notkun árið 2010. Íþróttahúsið er tvískipt. Annar helmingurinn er venjulegur íþróttasalur og hinn er stór fimleikasalur þar sem Fimleikafélag Akureyrar er með góða aðstöðu. Á sumrin er hægt að iðka ýmsar íþróttir á steypta vellinum hjá Giljaskóla en á veturna er hann fullur af snjó og því er það ómögulegt. Á veturna er því ekki hægt að iðka Íþróttir úti nema á gervigrasvellinum sem er hitaður upp. Fimleikaiðkendur nota íþróttasalinn við hliðina á fimleikasalnum mikið, sem er mjög gott. Þá nota þeir salinn til að t.d. hita upp og gera ýmsar æfingar. Mér finnst að salurinn ætti vera laus einu sinni í viku í klukkutíma fyrir fólk sem getur þá komið og stundað aðrar íþróttir á veturna. Í íþróttahúsinu er mikið af góðum íþróttatækjum sem væri hægt að nýta betur.  Ég er ekki viss um að nýting hússins yrði góð en það væri sniðugt að prófa.

Nokkrir grasvellir eru í hverfinu sem hægt er að nota á sumrin þegar það er ekki bleyta í jörðinni. Einnig eru margir leikvellir og eru þeir flestir í góðu standi. Í Giljahverfinu er engin sundlaug. Sundlaugin sem stendur næst hverfinu er Glerárlaug og er hún við hliðina á Glerárskóla. Í íþróttahúsinu er þó lítil sundlaug þar sem sérdeild skólans fer í sund, sem er mjög gott. Það mætti alveg koma sundlaug í Giljahverfi að mínu mati, en það er ekki bráðnauðsynlegt.

Fyrir utan þetta finnst mér vera góðir íþróttavellir og leikvellir úti í hverfinu og stórt og gott íþróttahús. Það mætti að mínu mati vera laus tími í íþróttahúsinu til að hafa fyrir fólk sem vill stunda blandaðar íþróttir einstöku sinnum. Annars finnst mér íþróttaaðstaða í Giljahverfi vera afbragðsgóð og til fyrirmyndar.

Anna Þyrí Halldórsdóttir 8. RK