Leitin að grenndargralinu

Í ágúst nk. verður boðið upp á fjölskylduútgáfu af Leitinni að grenndargralinu. Þrjár þrautir verða lagðar til grundvallar á jafnmörgum vikum og munu þær sem fyrr tengjast sögu og menningu Akureyrar. Þeir sem skila inn réttum úrlausnum fyrir tiltekinn tíma, öðlast rétt til að glíma við lokaþrautina sem vísar á gralið.

Allir geta tekið þátt, jafnt ungir sem aldnir. Engin takmörk eru fyrir því hversu margir skipa þátttökuliðin og þannig geta fjölskyldur eða vinahópar tekið sig saman og myndað lið.

Takmark þátttakenda er að finna Grenndargral fjölskyldunnar sem búið er að koma fyrir á vissum stað á Akureyri. Um er að ræða sérstaka afmælisútgáfu af Grenndargralinu. Gripurinn sem barist verður um á rætur sínar að rekja til Randers, vinabæjar Akureyrar í Danmörku.

Sigurvegurunum verður afhent gralið til eignar að leit lokinni. Öll lið sem klára þrautirnar þrjár fá viðurkenningarskjöl fyrir þátttökuna.

Þreifingar hafa verið milli Grenndargralsins og forsvarsmanna afmælis Akureyrarbæjar um hugsanlega aðkomu að hátíðarhöldunum í sumar. Umsjónarmenn Grenndargralsins áttu fund í síðastliðinni viku með Sigríði Stefánsdóttur, framkvæmdastjóra afmælisársins. Á fundinum var tekin ákvörðun um að bjóða upp á sérstaka afmælisútgáfu að Leitinni að grenndargralinu seinni hluta sumars. Um stutta útgáfu verður að ræða þar sem allir geta tekið þátt, jafnt ungir sem aldnir. Þessari afmælisútgáfu að Leitinni mun svo ljúka um það leyti sem hátíðarhöldin ná hámarki í sjálfri afmælisvikunni í lok ágúst.

Undirbúningur er hafinn en frekari fréttir af málinu verða birtar hér á heimasíðunni um leið og dregur til tíðinda.

Leitinni að grenndagralinu 2011 lauk mánudagskvöldið 7. nóvember. Það voru þeir Arnar Logi Kristjánsson og Hermann Biering Ottósson úr Glerárskóla sem fundu gralið. Þeir eru í 8. bekk.

Tíunda og síðasta þrautin fór í loftið kl. 17:00. Um var að ræða sex ljósmyndir af þekktum Eyfirðingum, lífs eða liðnum. Búið var að afmynda myndirnar svo erfiðara reyndist að glöggva sig á andlitunum. Myndirnar má sjá hér á síðunni undir liðnum Þraut vikunnar. Þátttakendur áttu að hringja í umsjónarmann Leitarinnar þegar þeir töldu sig hafa nöfnin og fá í kjölfarið þrjá síðustu bókstafina. Liðin voru misjafnlega lengi að átta sig á myndunum þrátt fyrir góðan stuðning fjölskyldumeðlima. Víða höfðu þeir safnast saman til að hjálpa þátttakendum á lokametrunum. Allt var lagt í sölurnar til að nálgast gralið. Hringt var í vini, vandamenn og jafnvel fræðimenn á hinum ýmsu sviðum.

Sumar myndirnar vöfðust nokkuð fyrir krökkunum og aðstoðarmönnum þeirra. Ein reyndist þeim þó sérstaklega erfið en allt hafðist þetta á endanum. Eftir að hafa fengið þrjá síðustu bókstafina tók næsta verkefni við. Nú þurfti að raða saman bókstöfunum og finna lykilorðið. Lykilorðið í ár var Hrappsstaðaá. Þegar það var í höfn fengu þátttakendur lokavísbendingu og þar með var vinnu umsjónarmanns lokið og þátttakendur á eigin vegum. Vopnaðir upphafslínum tveggja ljóða lögðu þeir af stað í mikla leit að tengingu við dvalarstað grenndargralsins. Þeir þátttakendur sem áttuðu sig á að ljóðin tvö báru sama heiti sáu fljótt á að þar hlaut vísbendingin að liggja. Ljóðin heita Heimkoman rétt eins og bók sem Björn Þorláksson, ritstjóri með meiru, gaf út árið 2009. Þeir félagar Arnar Logi og Hermann voru fljótastir allra að yfirstíga hindranir kvöldsins og átta sig á tengingu ljóðanna við Björn og voru mættir að heimili hans um kl. 19:00. Björn tók vel á móti stoltum sigurvegurunum og afhenti þeim gralið.

Tveir höfðu lokið leik meðan hópur duglegra krakka barðist áfram við þrautir og vísbendingar, ýmist heima fyrir framan tölvuna eða úti í hlýju sunnanrokinu. Liðið sem varð í öðru sæti fórnaði höndum af vonbrigðum og skal engan undra. Eftir allt erfiðið er sárt að sjá á eftir því sem allt snýst um. Síðustu gestir að heimili Björns Þorlákssonar þetta kvöld komu um kl. 21:30. Enn voru þátttakendur að hringja í umsjónarmenn þegar aðeins um ein klukkustund lifði af deginum. Áður en nóttin skall á höfðu sumir gert áætlanir um að halda áfram leit morguninn eftir. Þegar þriðjudagurinn 9. nóvember rann upp höfðu fæstir frétt af fundi gralsins. Það var svo loksins staðfest kl. 8:40 að gralið væri fundið og nokkru síðar kom tilkynning þess efnis hér á heimasíðu Leitarinnar.

Umsjónarmenn Leitarinnar óska sigurvegurunum og öllum þeim sem fóru alla leið og kláruðu þrautirnar tíu til hamingju með árangurinn. Þið stóðuð ykkur vel og megið vera stolt af frammistöðu ykkar. Með henni hafið þið verið öðrum góð fyrirmynd og sýnt að með þrautseigju og áræðni er hægt að ná langt.

Mánudaginn 7. nóvember hefst tíunda og jafnframt síðasta vika Leitarinnar að grenndargralinu 2011. Löng og ströng leit er að baki og þátttakendur hafa lagt mikið á sig við lausn þrautanna. Framundan er hörð samkeppni milli liðanna sem eftir standa. Nú gildir að vera sem fljótastur að leysa lokaverkefnin sem vísa á gralið. Endaspretturinn fer fram með eftirfarandi hætti:

Síðasta þrautin birtist á heimasíðu Leitarinnar mánudaginn 7. nóvember kl. 17:00. Þar með hefst kapphlaupið mikla. Ólíkt fyrstu 9 vikunum (þar sem ekki skipti máli hvenær lausnum var skilað) skiptir öllu máli núna að skila lausninni til umsjónarmanns sem fyrst. Þátttakendur geta skilað henni af sér á skólatíma eins og tíðkast hefur fram að þessu. Þar sem tíminn skiptir öllu máli nú má koma lausninni áleiðis með öðrum hætti svo sem með tölvupósti eða símtali. Þátttakendur verða að meta með hvaða hætti auðveldast sé að koma lausninni til umsjónarmanns á sem stystum tíma.

Ef lausnin við þraut 10 er rétt fá þátttakendur lokavísbendingu frá umsjónarmanni. Hún vísar þátttakendum á gralið. Það lið sem finnur gralið sigrar í Leitinni að grenndargralinu 2011. Sigurvegararnir taka gralið með sér ef þeir hafa tök á því en láta aðra keppendur ekki vita af því að það sé fundið.

Aðeins þeir sem hafa skilað inn réttum úrlausnum við öllum þrautunum tíu og fengið bókstafina sem þeim fylgja geta fengið lokavísbendinguna sem vísar á gralið.

Kæru þátttakendur.

Þið hafið staðið ykkur vel. Frá því í haust, þegar Leitin hófst, hafa nokkur lið hætt þátttöku. Þið eruð komin alla þessa leið vegna áhuga ykkar og þrautseigju. Nú getur allt gerst. Grenndargralið er handan við hornið. Aðeins tvö verkefni sem þarf að leysa áður en það kemst í ykkar hendur.

Með dugnaði ykkar og útsjónarsemi hafið þið sýnt að þið getið leyst erfið verkefni á stuttum tíma. Vera kann að síðustu tvö verkefnin reyni á þolrifin hjá einhverjum. Hafið það hugfast að þið eruð búin að sýna margoft að þið getið leyst verkefni sem við fyrstu sýn virðast óleysanleg. Með þolinmæði og elju er allt hægt. Þið megið nú sem fyrr nýta ykkur alla þá aðstoð sem þið getið fengið t.d. frá mömmu, pabba, ömmu og afa. Munið að góðir hlutir gerast hægt!

Gangi ykkur vel.

Umsjónarmenn Leitarinnar að grenndargralinu.

Smellið á myndirnar til að stækka þær.

Langri og strangri leit að karamellukrukkunni er lokið. Það var hann Sindri Unnsteinsson í 8. bekk í Glerárskóla sem fann krukkuna.

Mánudagurinn 10. október hefur án efa reynt á margan leitandann. Hópur duglegra krakka lagði af stað í leit að krukku klukkan 15:15 eflaust í þeirri von að leitin yrði stutt og átakalítil. Annað átti eftir að koma á daginn. Vopnuð vísu hélt hópurinn á vit ævintýranna og sumir með aðstoðarmenn með sér. Komið var við á hinum og þessum stöðum í bænum en án árangurs. Alls staðar gripu krakkarnir í tómt. Myrkur skall á og nokkrar klukkustundir að baki við leit en krukkan enn í felum. Þar með var orðið ljóst að karamellukrukkan yrði á sínum stað yfir nótt og það í fyrsta skipti í fjögurra ára sögu Leitarinnar. Gefin var út tilkynning um frekari vísbendingar daginn eftir.

Þriðjudaginn 11. október mættu krakkarnir í skólann, misjafnlega sáttir með tímann sem þeir höfðu eytt í leitina daginn áður. Nú var stund milli stríða og aðeins hægt að bíða eftir annarri vísbendingu. Bárust fregnir af foreldrum sem ætluðu að halda leit áfram meðan krakkarnir kláruðu skóladaginn. Ekkert fréttist þó af fundi karamellukrukkunnar þegar önnur vísbending fór í loftið. Þar með fór boltinn loksins að rúlla. Tæplega hálfri klukkustund síðar höfðu nokkrir bílar safnast saman á Hlíðarfjallsvegi, miðja vegu að Skíðastöðum en þar var karamellukrukkan grafin í jörðu. Sindri var fyrstur til að finna skilti sem á stóð: KRÚS og þar með sjálfa krukkuna.

Sindri fær fulla krukku af karamellum að launum auk þess sem hann fær ís að eigin vali fyrir tvo í boði Litlu Ísgerðarinnar. Ísgerðin er í Gránufélagsgötu og mun hún án efa taka á móti Sindra með angandi vöffluilm og sínum einstaka vanillu- og jarðaberjaís.

Sumir hafa séð stóru vinnuvélarnar hjá Síðuskóla og hugsað með sér hvað sé að gerast. Svarið er einfaldlega það að verið er að byggja nýtt elliheimili.

Byrjað var á verkinu þetta árið og verkinu á að vera lokið þann 1.september 2012. Þann 11.mars 2011 var tekin fyrsta skóflustungan. Voru þar margir viðstaddir.

Um er að ræða fimm kjarna og í hverjum kjarna eru níu íbúðir. Það verða semsagt 45 hjúkrunarrými. Kjarnarnir verða tengdir með göngum og verður stór samkomusalur inn á milli kjarnanna. Þar verður líka iðjuþjálfun, sjúkraþjálfun og skrifstofa deildarstjóra.

Ásamt 45 herbergjum verður eldhús, borðsalur, setustofa, vinnurými, þvottahús og geymslur. Stærð hússins verður 3.752m² og stærð lóðar er 16.340m² . Áætlaður kostnaður er um 1,25 milljarðar króna auk búnaðar.

En aðalmálið er samt að gamla fólkinu líði vel og finnist lífið enn með tilgang þrátt fyrir að þau séu orðin gömul. Þá skiptir kostnaður engu máli.

Heimildir: Akureyri.is og mbl.is

10. október 2011

Höfundur: Þóra Katrín Erlendsdóttir, 8. bekk Síðuskóla.